Bagikeun ka Lapak Facebook

Saha ÉtaSenén, 10 Juni 2013 00:34

Lia Refany, Tetep Manggung di Satengahing Kasibukan

Ku Maruta Bayu
SN
Lia Refany, penyanyi Pop Sunda [Potret: Maruta Bayu]

(SundaNews, Bandung) Di satengahing pagelaran kasenian di Grha Emeral, Jl. Cimuncang 30, Bandung, Lia Refany ngahaleuang musikalisasi Sajak Sunda “Layung Situ Panjalu”, karya Dhipa Galuh Purba, Ahad (9/6/2013). Lia minton jeung sawatara penyanyi séjénna saperti Awang Purimah, Wahyu, Putri, jeung nu séjénna.

Lia Refany, ngaranna geus teu bireuk deui di palataran pop Sunda. Nepi ka kiwari, lagu-lagu anu digalindengkeun ku Lia Refany, masih kénéh dipikaresep ku balaréa. Malah aya diantarana lagu Lia anu dinyanyikeun deui ku biduan pop Sunda séjénna. Dina sapopoéna Lia mémang henteu murni ngahususkeun diri di dunya nyanyi pop Sunda. Aya kasibukan séjén anu merelukeun kadisiplinan jeung tanggungjawab. Lia ngajar di SMA BPI 1 Bandung, sarta kiwari keur ngaréngsékeun S-3 di Universitas Nusantara Bandung.

Kilang kitu, satungtung henteu ngaganggu kana tugas utamana, Lia tetep nyumponan pangulem pikeun manggung dina rupaning acara. Malah lain baé diondang nyanyi, da puguh Lia ogé mindeng diperedih jadi MC dina sawatara acara. Pangalamanna siaran di Radio Antassalam FM nganteurkeun Lia jadi mibanda kaparigelan séjénna salian ti nyanyi, nyaéta jadi pembawa acara. Malah kungsi ngasuh acara kawih di CT Chanel.

“Ayeuna mah siaran tos lirén, kumargi jam ngajar langkung padat. Duka pami énjing pagéto tos gaduh waktos deui kanggo siaran mah…” kitu ceuk Lia basa ditepungan ku LB, mangsa keur mancén ngajurian Lomba Nyanyi Lagu Mandarin. Mémang Lia ogé mindeng diondang pikeun ngajurian lomba nyanyi. Tug nepi ka masyarakat Tionghoa nu matuh di Bandung, sababaraha kali ngulem Lia pikeun ngajurian lomba nyanyi. Puguh baé lain lomba nyanyi pop Sunda, da éta mah lomba lagu pop Mandarin. “Abdi kabagéan ngajén téknik vokalna. Margi ari rumpakana mah da teu ngartos….” Kitu ceuk ieu penyanyi album “Saukur Cimata” (Valentino Jaya Abadi), anu saméméhna ogé kungsi diperedih ngajurian lomba nyanyi Lagu “Muslimah” anu dinyanyikeun ku Fitri Widjayanti.

Kumaha ari tawaran manggung? “Alhamdulillah dugi ka ayeuna ogé uleman mah aya baé. Nanging sok ditingal heula waktosna, bilih pagedrug sareng ngajar. Upami teu ngaganggu pancén utami, tangtos baé sok ditampi,” kitu pokna. Nurutkeun Lia, nu ngulem manggung téh mémang seuseueurna mah dina acara hajat pertikahan. Biasana sanés baé ngulem nyanyi pop Sunda wungkul, da sok nuhunkeun sapakét sareng upacara adatna. Ku kituna, Lia kajurung pikeun ngadegkeun Lingkung Seni, anu diajangkeun keur nyumponan rupaning paménta nu ngondang. “Sasarengan wé sareng sobat-sobat,” kitu pokna ieu penyanyi kalahiran Tasikmalaya.

Lia Refany lain kakara ayeuna-ayeuna mikaresep dunya nyanyi téh. Ti leuleutik ogé geus kataji pikeun diajar nyanyi. Kilang kitu, ari cita-cita anu utamana mah hayang jadi guru. Lia henteu milih ngaguruan kasenian, da anu diteuleumanna PKn. Nya, antukna nepi ka kiwari Lia mancén jadi guru PKn.

Perkara nyanyi, najan enya ogé mangrupa pangaresep, tapi diteuleuman kaitung daria. Tug nepi ka antukna Lia bisa nembus ka dapur rékaman.  Hayang bisa rékaman album téh jaman harita mah kaitung hésé. Lia ngalakonan prosés anu panjang jeung kudu ditebus ku kauletan jeung kadariaan. Mimitina, taun 2002, Lia miluan jadi patandang Bintang Radio tingkat Jabar, anu digelar di RRI Bandung. Lia kapilih jadi pinunjul kadua. Sataun ti harita, Lia miluan pasanggiri pop Sunda anu diayakeun ku Yana Kermit Production jeung Asmara Record. Dina éta pasanggiri, ieu guru anu soméah téh kapilih jadi pinunjul kahiji.

Sanajan geus jadi pinunjul dina dua kali pasanggiri, tapi tacan bisa nganteur Lia ka dapur rekaman. Kilang kitu, Lia mah apan saukur nganteur pangaresep téa. Jadi, sugema baé rék kumaha ogé. Malah dina taun 2003 mah bisa jadi minangka taun hadé pikeun Lia, sabab bisa nyangking juara nyanyi dina sawatara pasanggiri. Geura, urang tataan: pinunjul 1 lomba nyanyi dina acara milangkala kota Bandung jeung kapilih jadi pinunjul 1 bintang Radio Jawa Barat 2003. Malah dina lagu dangdut ogé, Lia kungsi jadi pinunjul 1 dina acara Hardiknas.

“Dina ngahontal préstasi, anu utami mah urang kedah yakin kana kamampuh diri, bari teras teu lirén meuseuh diri ku cara teu petot-petot diajar. Abdi mah teu acan ngaraos tiasa, masih kénéh diajar dina sagala rupi hal ogé,” kitu ceuk Lia, mungkas wangkongan 


Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...