Bagikeun ka Lapak Facebook

Saha ÉtaSenén, 17 Séptémber 2012 03:55

Inovasi Anyar Musik Sunda

Ega jeung Robot Percussion

Ku Nana Munajat
SN
Ega Robot [Potret: Astri Cahyani]

Basa Robot Percussion manggung dina bubuka Pesta Buku Bandung 2012, méh sakur nu lalajo ngarasa hélok. Nyaksian pintonan Ega Robot saparakanca, réa nu ngarasa optimis, ana kitu mah kasenian Sunda téh bakal kacida panjang kénéh lalakonna.

Dina Majalah ”Seni Budaya” (ayeuna ”Langlang Budaya”), kungsi diguar basa Robot Percussion ngayakeun  kolaburasi jeung Dhidik Ninik Thowok, Waljinah Si Walangkéké di aula Universitas Nusantara (UNINUS) Bandung.

Ti barang prung manggung, ti mimiti tatalu nepi ka garapan poko karasa aya warna nu nenggang, pangpangna dina lebah metakeun komposisi gending. Wangun komposisi gendingna rada méngpar tina kailaharan, tapi upama dilenyepan leuwih daria, saéstuna éta téh wanda heubeul anu geus nyampak dina garapan tradisi.

Saperti lagu Siuh nu sok ilahar dipake dina seni gembyung buhun, bet ngadadak karasa pangling. Lagu nu aslina : “Siuh lain curug, séah lain hujan, hiliwir angin-anginan, angin-anginan, kunang-kunang ngahibaran”.

Éta lagu jadi robah, da diselapan warna bit Raf, direureueus ku bit jazz, dangdut jeung jaipongan. Hal ieu pisan minangka ciri mandirina garapan Robot Percussion, pingpinan Éga Robot, nu markasna di Jl..Cilengkrang II, RT.03, RW.03, Kel. Palasari, Ujungberung, Bandung.

Lian ti éta, karya gending jeung lagu nu matak ngahudang kapanasaran taya lian “Kogo 2000”. Sabéngbatan mah, judul laguna moal nyangka lagu Sunda, padahal eusina wancahan tina Kokosodan Gogoléran. Keur mah judulna kawas lagu latin, katurugturug pola tabeuhna digarap dina wangun komposisi musik kontemporér, atuh puguh wé beuki pangling.

Lagu séjénna, kayaning Mojang Priangan, Arion, Botol Kecap, Entog Mulang, jeung Tablo, sanajan dina wanda tradisi, ku pangropéa Éga Robot ngajangélék jadi wanda anyar nu leubeut ku motip jeung weweg dinamikana. Éga téh lalaki teureuh Tambak Mekar, Jalancagak, Subang, anu lahir 21 Desember 1975. Bisa disebutkeun musik kontemporér nu nyunda

“Grup Robot Percusion salawasna nyoko kana seni tradisi dina garap komposisi wangun kiwari. Légégna mah seni kontemporer anu digarap téh, sanajan masih kokontémporéran, dina harti disurahan ku mangrupa sikep kontémporér, nu teu weléh hanang ku parobahan jeung barang nu anyar.  Naon pangna nu digedékeun téh seni kréasi anyar? taya lian hayang muncunghulkeun warna anu luyu jeung kamekaran musik kiwari. Atuh dina lebah milih wanda musik, ngagarap musik kréasi anyar, lain hartina panglumpatan. Apan di antarana aya nu ngagarap musik kontémporér alatan teu taram-taram kana musik tradisi. Simkuring saparakanca, ludeung ngagarap musik wanda anyar téh, lantaran  geus wanoh kana musik tradisi.” Kitu saur Éga nembrakeun alesan pangna ngagarap musik wanda anyar.

Naon anu dicaritakeun ku ieu alumnus jurusan Karawitan SMKI Bandung, luyu jeung réalitas panggung, karya seniman ngora tamatan Jurusan Musik, Sendratasik, FBSS, Universitas Pendidikan (UPI) Bandung, sacara musikalmah bisa disebutkeun musik kontémporér, tapi rohna mah éstu kandel rasa Sundana.

Sapanjang pagelaran dina lebah nempatkeun materi kawilang nyurup tur ngaruntuy sarta dina mintonkeunna mungguh atraktip. Réngrénganana téh di antarana Dédé Suhara (saron), Adé Mardiana (goong), Dodi Darsono (saron), Ari (gambang), Yoséf (kendang), Hedi (saron/dalang), Yoga (kendang/dalang), Berlin (kendang), Dahyar (kendang), Yoyon Darsono (piul, tarompét, Rebab), Danis (rebab, kacapi/ stag), Engkus (suling/demung), Asép Uwit (kecrek), mungguh tapis, parigel  boh dina nabeuh boh lebah ngareureus dinamika lagu.

Dina lebah kawih, éstu matak gantung déngéeun. Unggal pintonan lagu kajiwaan pisan, katambah kualitas sorana hadé pisan. Teu kitu kumaha, da anu ngawihna  Masyuning, Cucu Setiawati, Rika Rafika, Arum Pujianti jeung Rita Tila, minangka juru kawih ngora petingan.

Hiji hal anu ngalantarankeun ieu grup pintonan mibanda greget, nyaéta lebah ngadumaniskeun waditra gamelan jeung alat-alat perkusi. Dina metakeunna karasa gumulung tur teu tumarumpang. Aya hal nu matak pikayungyuneun, nyaéta raketna jeung warna lokal, dina unggal lagu teu weléh diselapan ku warna-warna musik tradisi nu hirup di lembur matuhna. Motip tabeuh jeung gending sisingaan, katut genjring bonyok teu weléh ngahias garapannana.

Grup nu kiwari maneuh mirig Dalingding Asih Bandung TV, volume manggungna kawilang padet, sarta remen diajak kolaborasi ku seniman moyan, di antara  jeung DKSB pingpinan Harry Rusly (alm), Gentra Madya pingpinan Nano S., Dicky Chandra, Inul Daratista, jeung Andi RIF, geus sababaraha kali asup dapur rékaman. Kurang leuwih aya kana 10 albumna nu geus diproduksi ku Robot Percussion, diantarana Sekar Panggung jeung Tablo Kréasi. Pangalaman manggungna, sababaraha kali ngalanglang mancanagara.

Robot Percussion diwangun ku sababaraha seniman ngora anu mibanda idealisme pikeun ngawangun karawitan Sunda. “Nu jadi ide dasar ngadegkeun grup taya lian hayang ngahijikeun seniman entragan ngora nu ngabogaan jiwa progresif, nu hanaang ku rupa-rupa kaweruh ngeunaan seni. Geus meujeuhna seniman Sunda ngahiji, sugan ari ngahiji mah bakal leuwih weweg mun ngawangun garapan téh,” cek Éga nu cenah ngaidolakeun Nano S, Ismet Sambasunda, Harry Roesli, Asép Sunandar, Dédé Amung S Sutarya, Bambang Arayana, jeung para tokoh seniman séjénna anu geus méré atikan jeung didikan sarta nu geus ngagedékeun dirina.

Saterusna Éga ngedalkeun kereteg angenna sangkan seniman Sunda jalembar manah. “Mun seni Sunda hayang nanjeur, sawadina kudu méré panghargaan kana garapan anu lian, leupas alus jeung gorengna. Ulah gampang nyawad, sabab nyawad ka batur sarua jeung ngaheureutkeun jeung ngareunteutkeun sumanget, antukna seni urang atung-atung kénéh kalindih ku bangsa deungeun.” pokna daria.

“Geus meujeuhna seniman Sunda téh samiuk sabilulungan, siliwawangi, jeung silitanjeurkeun, sieuhkeun pacogrégan papada urang, anu salawasna tinangtu teu luput tina kasalahan jeung kakurangan.” Ega mungkas wangkongan. 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...