Bagikeun ka Lapak Facebook

Ukur BanyolHeuheuy DeuhAhad, 29 Juli 2012 18:42

Puasa Ningali Wanoja, Kajaba...

Ku Dhipa Galuh Purba
SN
Tukang Per jeung Iklan Kos [Potret: Zaenal Mutaqin]

PIKEUN ngahormat bulan puasa, ceuk Ulis Kowi, sakur kagiatan di Cigorowék anu aya patula-patalina jeung ngadu,  kudu dieureunkeun heula. Kayaning ngadu bagong, ngadu hayam, ngadu domba, ngadu rahul, ngadu muncang, jeung ngadu sagala rupa pokona mah. Hal ieu, ceuk Ulis Kowi kénéh, diluyukeun jeung kaayaan di kota jeung di dunya maya. Apan di kota ogé, salila bulan puasa mah diskotik ogé ditutup.  Pon kitu deui di dunya maya, situs anu sakira-kirana matak ngahudang nu sok babarian hudang mah; salila bulan puasa, moal bisa diaksés.

"Kumaha tah lamun geus liwat bulan puasa?" Kulisi Ook tumanya, bari rada kurang-kerung.

  "Nya biasa wéh, dilanjut sakumaha sasari..." témbalna kalem naker.

Beda deui jeung paniatan Jang Isud, anu kamari ieu (ngadadak) rus-ras, kasuat-suat deui  lalampahanana jeung Néng Mincreung sababaraha taun kaliwat. Najan nurutkeun balabar kawat mah Néng Mincreung téh bakal aya nu mileuleuheungkeun. Tapi, ceuk Jang Isud; salila can aya janur konéng hareupeun imahna, Néng Mincreung masih kénéh milik manéhna... aéh balaréa.

"Pikeun ngahormat bulan Puasa, bulan Syawal, bulan Hapit, bulan Rayagung, tug nepi ka bulan Rajab, uing rék puasa ningali sakur awéwé. Satékah polah moal ningali sing saha baé jeung urang mana baé, kajaba Néng Mincreung," kitu tah minangka niat teu mulya Jang Isud téh.

            Teuing kumaha atuh éta Jang Isud, da teu beunang dihalang-halang. Najan ku nu nulis ieu carita geus dipépélingan ogé, kalah ngajawabna téh kieu: Jodo mah aya dina leungeun Pangéran, lain dina leungeun pangarang. Tungtungna kalah weléh nyarita, kabau-bau sungut, kajeding-jeding biwir. Padahal, ari dina dunya carita mah, nya tangtu wé sagala rupana kumaha pangarang. Teu pati béda jeung lalakon wayang, apan alurna carita téh kumaha dalang.

Tah, palebah dieu Jang Isud matak ngajangarkeun sirah. Nu matak, bisi isuk jaganing géto aya perkara naon baé anu tumiba ka Jang Isud, omat pangarang mah ulah disakompét daunkeun. Pangna kitu, da Jang Isud mah hayang mawa karep sorangan. Teu bisa diatur ku nu ngarang. Buktina ti maleman munggah ogé, Jang Isud geus mimiti ngerem manéh di luhur para. Pokona mah teu meunang aya nu nepungan, kajaba lalaki, atawa Néng Mincreung.

"Pokona mah uing moal turun ti para, satungtung Néng Mincreung tacan unggah ka dieu..." kitu susumbarna Jang Isud.

"Isud! Ieu aya tamu!" indungna gegeroan ti tengah imah bari tatanggahan.

"Saha?" tanya Jang Isud.

"Neng Cucu," témbalna.

"Punten, abdi teu tiasa ditepangan, nuju sibuk!" kitu témbalna.

            "Kumaha atuh ieu oléh-oléhna? Mangkaning mawa kabeuki silaing!" ceuk indungna deui.

"Husus oléh-oléhna mah, mangga dihaturanan linggih ka para," Jang isud mani curinghak. Ari kana babawaanna mah, teu sirikna dirawu dipangku. Na ari ka nu ngirimna, mani teu daék nepungan pisan. Sigana mah loba teuing lalajo film “Cowok Komersil”.

Kamahiwalan Jang Isud geus lumangsung aya kana samingguna. Nepi ka sakali mangsa, indungna geus gegeroan deui baé; ngabéjakeun yén aya tamu nu hayang panggih.

"Lalaki atawa awéwé?" siga sasarina, Jang Isud nalék heula.

"Awéwé," témbalna.

“Saha?”

“Nyi Imas!”

"Cik atuh, Ma. Apan uing geus nyarita ti mimiti, meunang samentaun mah moal waka panggih jeung Awéwé, kajaba Néng Mincreung!" kitu pokna Jang Isud.

"Enya, geus apal éta ogé. Tapi ieu mah da lain awéwé samanéa,"

"Na kumaha kitu?"

            "Heueuh. Ieu téh ngahajakeun datang ti Jakarta, diutus ku Ayu Tingting..." na atuh, ana gajleng téh, Jang Isud luncat ti lawang para. Lat poho kana sagala rupa, duméh ngadéngé ngaran: Ayu Tingting.

            "Nuhuuun Gusti. Sigana taun ieu mah, uing bakal tinekanan  duét jeung Ayu Tingting. Kajeun teuing uing mah teu laksana ka Néng Mincreung ogé, asal bisa laksana duét jeung Ayu..." kitu gegerenyemanna Jang Isud bari tuluy muka panto. Blak, panto muka. Breh, kasampak Bi Iroh geus ngabedega bari nyiapkeun buku jeung patlot.

"Kiriditan sendal, geus dua bulan can setor..." pokna Bi Iroh bari rada muncereng. Puguh baé Jang Isud medenghelna. Dicipta-cipta rék manggih pikabungaheun, ari heug téh kalah patepung lawung, paamprok jonghok jeung anu nagih. Atuh teu loba catur deui, ngan sakilat nerékel deui kana para bari ngajorowok, "Jang Isud mah teu aya, nuju dines di Paméran Buuk, aéh Paméran Buku..."

"Ari bieu nu muka panto na saha? Piraku jurig mah. Awas siah, moal dibéré nganjuk sarung deui!" Bi Iroh kutuk gendeng bari ngaléos.

            Ti harita, Jang Isud teu kungsi daék deui upama dititah turun ku indungna. Pokona mah rék saha baé, atawa utusan saha baé, Jang Isud keukeuh mumul turun.

"Ieu aya utusan Rika Rafika, rék ngajak duét Pop Sunda!" ceuk indungna.

"Moal katipu," témbalna.

"Ieu aya utusan Presiden, rék diangkat Mentri!"

            "Moal turun lah! Mentri-mentri tai pedut... "

            "Ieu aya utusan Pa Umuh, rék ngajak maén di Persib!" ceuk indungna, mani taya kabosen pisan.

            "Bejakeun ka pa Umuh, uing mah geus dikontrak ku Realmadrid," Jang isud teu éléh géléng.

            "Ieu aya Pa Kadus Ukar...!"

            Tah, ngadéngé Kadus Ukar mah, Jang Isud teu kadéngé némbalan. Sabab, Kadus Ukar téh bapana Néng Mincreung. Teuing ngagunakeun ajian nanahaon, da nyaho-nyaho téh geus munjungan ka Kadus Ukar.

"Damang, Pa Kadus?" Jang Isud mani mamandapan, hayang kapaké.

"Pangésto, Jang. Na tos ti mana kitu, éta buuk mani pinuh ku ramat?"

            "Euh, éta Pa Kadus, nembé téh tos ngalereskeun kenténg. Biasa, balocor waé atuda,"

            "Na iraha aya hujan?"

            "Aéh, maksad téh bocorna mah teu acan tangtos. Ieu mah ngajagi-jagi wéh, bilih bocor,"

            "Na ti iraha maké kenténg? Asana mah imah téh masih kénéh maké eurih lin,"

            "Sumuhun, maksad téh ngalereskeun eurih," bubuhan ngabohong téa, Jang Isud nyaritana teu weléh saralah. Kilang kitu, Jang Isud teu katingali riuk-riuk éra. Kalah pok deui tumanya, "Dupi Néng Mincreung, naha henteu ngiring?"

            "Nu matak, budak téh rada mahiwal puguh," témbalna.

            "Mahiwal kumaha, Pa Kadus? Wios mahiwal ogé, da abdi mah rido..." Jang Isud kerung.

            "Enya, sajabana ti hayang tamat puasa téh, dina taun ieu mah pajarkeun téh hayang tamat sangkan henteu panggih jeung silaing. Mangkaning kuring téh ngadéngé beja mun yén silaing ogé hayang tamat sangkan teu papanggih jeung sasaha, kajaba jeung budak kuring. Na rék kumaha pamustunganana atuh? Budak kuring keukeuh embung panggih. Ari silaing bet keukeuh hayang panggih. Cik sing aya nu ngéléhan atuh salah saurang!" kitu ceuk Kadus Ukar.

Meunang sakedapan mah Jang Isud ngahuleng ngaragameneng. Tuurna ngadadak nyorodcod. Késang badag, késang lembut, maseuhan sakujur awakna. Rét ka kénca, rét ka katuhu, taya nu méré bongbolongan. Antukna mah Jang Isud ngarérét ka pangarang, hayang ditulungan.

Tuh pan, angger-angger pamustunganna mah ka saha deui, ari lain ka pangarang. Hanjakal Jang Isud leuir teuing. Mun tatadi mula mah muntang ka pangarang, pasti caritana moal kitu. Ari rék dituluykeun, da kumaha atuh, lalakonna geus panjang teuing. Dituluykeun mah kuriak méakeun lahan batur. Engké wé, mun teu poho, minggu hareup dituluykeun deui.***

 

Kirim Koméntar tina Facebook

Koméntar (1)

jogaswara

gantung teureuyeun . . . . . . . .

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...