Bagikeun ka Lapak Facebook

Saha ÉtaSalasa, 24 Juli 2012 03:24

Nganjang ka Juara Tembang: Kari Mulyana

Ku Maruta Bayu
SN
Kari Mulyana [Potret: ]

 

Pasanggiri Tembang Sunda Cianjuran XX baris digelar deui di bulan Désémber. Kitu sakumaha anu dibéwarakeun ku Ganjar Kurnia dina acara pintonan “Kabeungharan Seni Sunda di Tatar Sunda”, di Grha Hardjadinata UNPAD, Jl. Dipatiukur, Bandung.

Dina Pasanggiri Tembang Sunda (PTS) XIX, anu jadi pinunjulna téh Rosyanti (wanoja) jeung Kari Mulyana (lalaki). Sawatara waktu kaliwat, SN nganjang ka bumina Kari Mulyana di wewengkon Mulyasari, Kel/ Kec. Balééndah, Kabupatén Bandung.

Enya ogé lain asli urang Bandung, tapi Kari kalintang micinta lembur tempat pamatuhanana, ku lantaran geus mangtaun-taun dumuk di Mulyasari. Komo deui lamun nilik kana ngaran lemburna anu henteu pati jauh jeung ngaran papanjangna, Mulyana-Mulyasari.

Sapopoéna, Kari ngajar di Jurusan Karawitan STSI Bandung. Lian ti ngajar, Kari sok manggung dina rupaning acara. Saperti dina pagelaran “Lutung Kasarung” anu disutradaraan ku Didi Pétét, Kari kapilih jadi juru rajah. Préstasina dina widang tembang, ngalantarankeun Kari dipercaya pikeun nété karir salaku dosén di STSI, sarta diulem dina rupaning acara. “Ieu téh nembé réngsé ngajurian pasanggiri tembang di Sumedang...” kitu pokna basa ngalalanyahan ngawangkong jeung “SN”.

Sigana tacan réa nu nyaho lamun lalakon Kari ancrub ka dunya seni, hususna seni tembang téh éstuning henteu dirarancang ti awalna, atawa henteu jadi salahsahiji cita-cita tibubudak. Malah nepi ka tamat SMA ogé, Kari tacan pati mikawanoh dunya seni, jajauheun kana seni tembang cianjuran.

Kari Mulyana, lahir di Cikijing, 26 Méi 1965. Munggaran nyuprih pangarti di SDN Sindang Panji, Cikijing. Tuluy, neruskeun ka SMPN Cikijing, sarta ka SMAN Talaga, Majalengka. Satamatna ti SMA, Kari miluan Sipenmaru, upama jaman ayeuna mah SMPTN téa, mangrupa sarat ujian pikeun asup ka paguron luhur. Ku lantaran henteu lulus Sipenmaru, Kari daptar ka IAIN Sunan Gunung Djati. Sabenerna mah geus katarima di IAIN SGD ogé. Tapi, Kari dititah ku kapilanceukna, Toto Amsar, sangkan daptar ka STSI Bandung (harita mah ngaranna masih kénéh ASTI). Nya, di STSI téh milih jurusan Karawitan.

“Abdi rada kagugusur, da teu terang nanaon. Bujeng hingga tiasa nabeuh gamelan, da terang bonang ogé nembé harita. Kapungkur mah kana bonang  téh sok nyebat kolénang wé. Paling ogé anu terang téh kana goong wé,” kitu cenah, ngumbar panineungan jaman munggaran wawanohan jeung dunya kasenian. Tapi ari ku keyeng tur daria mah, tina kagugusur téh antukna mah jadi bisa. Pangpangna mah harita Kari mindeng gaul jeung mahasiswa anu jolna ti SMKI. “Ku cara gaul, abdi tiasa diajar ka réréncangan. Alhamdulillah, saterasna mah henteu kagugusur deui...” pokna. Kari mindeng milu manggung jeung babaturan kuliahna anu geus wareruh matéakeun karawitan.

Ti mimiti diajar ngagoongan tug nepi ka diajar ngawih, disorang ku Kari  ti enol pisan, mangsa munggaran kuliah di STSI Bandung. Jauh kénéh kana nembang mah, da harita téh kalah ngagabung jeung grup calung. Tah, kana nyalung mah rada enyay-enyayan, lantaran basa keur jaman SD, kungsi diajarkeun ku guruna, Pa Sahrum. Tapi teu lila, da bapana Kari teu panujueun. Malah ku bapana Kari, Pa Sahrum téh kungsi dipaséaan sagala alatan ngajarkeun calung ka Kari. Dina sawangan mangsa harita, neuleuman dunya kasenian téh anu kabayangna jadi nayaga wé. Teu terang upama karawitan téh aya paguron luhurna jaman harita mah.

Basa keur meujeuhna resep nyalung, Kari digentraan ku Enip Suganda, anu saterusna méré saran sangkan Kari neuleuman tembang cianjuran. Ari mimitina mah ngaranjug, lantaran asa cangcaya kana kamampuh diri. Kilang kitu, piwejang Enip téh digugu ku Kari. Antukna Kari diajar nembang cianjuran. Hasilna? Luar biasa, jauh tina sangkaan mimiti. Manahoréng, saran Enip Suganda téh lain saukur catur tanpa bukur. Kari bisa ngangkem cianjuran ku cara soson-soson tur daria latihan. Malah basa diabenkeun dina pasanggiri tembang KORPRI, Kari nyorang kasuksésan jadi pinunjul. Kari mingkin getol latihan. Malah kungsi guguru langsung ka Euis Komariah. Rasa percaya diri beuki ngandelan, anu antukna kajurung pikeun milu tandang dina PTS anu diayakeun ku DAMAS.

Puguh baé henteu langsung jadi juara. Kungsi sababaraha kali lolos ka babak final tur nyangkin juara harepan, juara kadua, malah kungsi nepi ka henteu lolos final ogé. Tapi ku keyeng dibarung naggedurna sumanget, Kari antukna bisa nyangking Piala Pancaniti taun 2009, dina PTS XIX téa, anu digelar di Kampus UNPAD, Jl. Dipatiukur, Bandung. Préstasi anu dicangking ku Kari, henteu leupas tina pangrojong bojona, Néty, anu sapopoéna ngajar tari SDN Galih Pawarti. Kari jatukrami ka Nety 9 Juni 1994, tur kiwari geus boga turunan dua urang. 

Salaku praktisi tembang cianjuran, puguh baé Kari miharep sangkan PTS tetep dipertahankeun kalumangsunganana. Pangpangna mah pikeun ngoréhan sirung-sirung anyar generasi ngora nu baris nuluykeun ngamumulé tembang cianjuran. Sanajan lain urang Cianjur, kiwari Kari geus leyur dina cianjuran, kalintang micinta seni tembang cianjuran.

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...