Bagikeun ka Lapak Facebook

Sastra SundaÉséyKemis, 12 Juli 2012 19:51

Pilem di Bioskop Heubeul

Ku A. Sundira

Ku A. Sundira

ÉTA bioskop téh perenahna di kota kacamatan. Teu pati jauh ti alun-alun mah. Wangunan heubeul, da dijieunna gé cenah jaman Walanda. Nu bogana teuing Tuan nanahaon mah. Taun 80-an sok dipaké kénéh muter pilem, tapi henteu lila. Kungsi dipaké ku barudak Karang Taruna paranti maén téater. Henteu lila deuih.

Basa kuring mimiti ngontrak imah di tukangeun éta bioskop, ujug-ujug disuguhan dongéng nu pikakeueungeun. Teu sieun teu sing saenyana mah, ngan éta wé, dongéngna mani asa dijieun-jieun. Malah pamajikan mah mani pok pisan, "Cik atuh Kang, mani didéngé teuing."

Kuring gé lain pédah resep. Ngan rumasa jadi jelema ngumbara, sageuy mun haré-haré téh. Kuriak disangka teu guyub jeung batur.

"Tah kitu, Jang Kandi. Cenah mah nu boga bioskop téh marakayangan, naha éta bioskop henteu dipaké tur diantep sina narikolot." cék Mang Uju, nu sok dagang cikopi di sisi jalan, hareupeun pisan gedong bioskop. Harita téh keur ngadon ngopi pasosoré, bari nénjokeun barudak nu keur jalan-jalan.

"Boa ukur téténjoan, Mang?"

"Hih, Emang mah nyaksian pisan. Harita téh dagang nepi ka jam 12 peuting. Geus simpé pisan, mobil gé ukur hiji-dua nu ngaliwat téh. Balikna Emang ngaliwat ka hareupeun bioskop. Bet katénjo réa nu ngalaliud, siga nu keur ngantri rék meuli tikét. Belenyeng wé lumpat, térmos cai nepi ka peupeus. Teu percaya mah tanyakeun ka ibina."

"Enya kitu?"

"Hih, éta ku siga cangcaya. Lain Jang Ohim ogé kungsi manggihan?" pokna, bari ngarérét ka Jang Ohim nu kakara ngurunyung.

"Naon téa, Mang?" cék Jang Ohim.

"Éta, jurig di bioskop ..."

"Enya puguh... Cik pangnyieunkeun heula indomi samangkok!"

"Manéhna!" Mang Uju ngarérét ka pamajikanana. "Indomi samangkok! Terus kumaha, Jang?"

"Harita téh malem Jumaah. Kuring tas nyiar tahu ti Sumedang. Lantaran hujan ngagebrét ti beurang kénéh, atuh balik téh peuting. Eukeur mah mani hésé angkot deuih. Nepi ka dieu téh jam sawelas..." cék Jang Ohim bari ngarongkong roko sabatang. Sut diseungeut. Kuring mah anteng ngararasakeun haneutna cikopi.

"Barang jrut tina angkot, euweuh sasaha. Hujan ngaririncik kénéh. Tah, Mang..."

"Kumaha, Jang Ohim?"

"Ti lebah bioskop bet kadéngé sora nu ngaguruh. Aya nu patinggorowok. Aya nu ayeuh-ayeuhan. Jep nu ayeuh-ayeuhan, geus kitu kadéngé sora siga pilem keur diputer. Lah, kitu sorana téh. Ger deui surak..."

"Éta sugan ku Ujang ditempo?"

"Boro-boro, keueung wé nu aya. Awak ngadadak patingsariak."

"Tah, kitu Jang Kandi," Mang Uju ngarérét ka kuring. "Réa nu kungsi nyaksian mah."

"Atuda ayeuna mah bioskop téh geus teu payu," cék kuring. "Réa nu geus boga visidi, nyetél pilem téh bisa di imah, tumaninah. Éta gé di kota mah aya kénéh, tapi da sigana lain keur nénjo pilem-pilemna teuing. Ukur keur hiburan baé, tamba kesel cicing di imah. Mun teu kitu dipaké bobogohan."

"Enya. Matak naon ieu bioskop gé ramékeun deui, meureun dagangan Emang leuwih payu!"

Geus béak kopi mah, terus baé amitan. Bus kana gang, nuju ka imah kontrakan. Gang nu diapit ku bioskop jeung kantor KUD gigireuanana. Ti lebah gang, aya lawang leutik nu ngahubungkeun jeung bagian bioskop beulah tukang. Bet panasaran, sup baé ka jero. Tanggah heula sakeudeung, nénjo éta wangunan nu ngajungkiring.

Cék Mang Uju, lawang beulah tukang mah henteu dikonci. Cenah sok dipaké ulin ku barudak rumaja, ngadon hihitaran di jero bioskop. Bus ka jero. Reyem-reyem najan ti beurang, da puguh di jero téh henteu dipasangan lampu.

Meunang sajongjongan mah leuleumpangan niténan kaayaan di jero bioskop. Katémbong henteu kaurusna téh. Korsi heubeul ngajajar, pinuh ku kebul. Kaén nu nutupan layar geus rangsak, tinggal sabeulah. Di lanté dua, tempat proyéktor, mani pabalatak. Korsi nu ruksak pasoléngkrah.

Asup ka toilét, mani canéom jeung barau. Matak engap.

*

NU ngajual tikét téh mani kuraweud, boro-boro seuri. Beungeutna sepa siga nu kurang saré.

"Sabaraha?" cék kuring.

"Lima pérak!"

"Har, naha murah-murah teuing?" pok téh bari ngasongkeun duit saratus rébu, da euweuh récéh.

"Duit nanahaon ieu?" pokna bari mureleng.

"Duit saratus rébu, pulanganeun."

"Asup wéh!" pokna bari ngasongkeun duit jeung tikét.

Bari jeung kerung gé, sup baé ka jero. Nu ngajaga karcis mani jangkung gedé, papakéanana anéh, ongkoh lalaki tapi siga maké mukena. Sarua deuih kuraweud.

Di jero taya sasaha, iwal ti korsi nu ngajajar. Kaayaan reyem-reyem, méh teu katénjo curuk-curuk acan. Pilem geus diputer. Lampu tina proyéktor ngabarasat luhureun sirah.

Rarat-rérét ka sisi ka gigir, euweuh nu diuk iwal ti kuring sorangan. Anéh, najan nu  lalajo ukur sorangan tapi pilem bisa diputer. Tungtungna mah manco wé ka hareup, ngabandungan lalakon pilem.

Nu boga lalakon keur diudag-udag ku nu jahat. Palebah basisir, der garelut. Nu jahat éléh. Naha atuh, ari ger téh sora nu surak mani teu puguh déngékeuneunana. Rarat-rérét ka sisi ka gigir, angger taya sasaha. Rey ngadadak keueung.

Teu puguh kumaha tamatna, kalahka geus nyambung deui kana pilem kadua. Maca judulna gé geus matak muringkak: "Bangkit dari Kubur". Caritana ngeunaan awéwé nu digadabah, terus maéhan manéh, marakayangan hayang males kanyeri ka lima lalaki nu geus ngagadabah manéhna. Éta jurig awéwé téh bisa mindah rupa pikeun macikeuh lalaki nu rék diarah patina. Hiji-hiji lalaki nu ngagadabah téh nemahan pati.

Ari lalajo pilem horor mah geus mindeng. Ngan nu ieu mah aya ahéngna. Lalaki nu geus dipaéhan, terus dialungkeun nepi ka ngacleng kaluar tina layar. Terus dariuk dina korsi bioskop, milu lalajo. Kitu jeung kitu wé, nepi ka nu hiji mah ngaclengna téh ka gigireun pisan. Goak wéh awahing ku reuwas... komo basa dirérét, si jurig awéwé téh milu kaluar tina layar, ngarayap dina témbok...

*

NYAH beunta, ngimpi téh mani asa enya. Singhoréng lilir sotéh diguguyah ku pamajikan.

"Jam sabaraha ieu téh?"

"Tabuh dua belas..."

"Aéh, geuning tengah peuting." pok téh, bari lelembutan mah asa aya kénéh dina impian. Pamajikan katémbong mani ngoprot késang.

"Digugahkeun téh mani hésé!"

"Ari kitu aya naon?"

"Ti lebah bioskop, Kang, sada aya nu keur muter pilem..." pokna bari nangkeup tipepereket.***

Kirim Koméntar tina Facebook

Koméntar (1)

Chandra Kudapawana

haruuuh, maos seratan ieu tengah peuting. mana di luar girimis. muringkak sabulu-bulu ieu mah.

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...