Bagikeun ka Lapak Facebook

Sastra SundaÉséyKemis, 12 Juli 2012 19:41

Bubutuh Buku

Ku Dadan Sutisna

Ku Dadan Sutisna

Ngawangkong jeung Mang Uju, urang Darangdan. Panggih téh di tempat gawé, da manéhna mindeng nganjang ka Bandung. Nya kitu, ari datang ti lembur téh teu weléh angkaribung sagala dibawa, sabangsaning kadaharan lembur. Ngan balikna gé angkaribung deui, mawa majalah jeung buku nu geus urut.

Mimitina mah rada hémeng, naha unggal ka Bandung, balikna sok ngaringkid majalah jeung buku. Singhoréng, di lemburna Mang Uju muka pabukon (perpustakaan) nu dingaranan Pabukon Saba Désa. Unggal poé buku jeung majalah urut téh diiderkeun maké sepédah, diséwakeun ka urang lembur. Tétéla loba nu resepeun cénah, ari diasrogkeun mah. Da éta baé, tina ladang nyéwakeun buku téh, maké kungsi ngayakeun Pasangiri Maca keur urang lembur.

"Ayeuna mah urang lembur ogé geus raresep maca!" pokna.

Tangtu baé kajadian kawas kitu téh henteu lumangsung di unggal tempat. Bané wé, Mang Uju mah rapékan, daék néangan majalah jeung buku urut katut ngiderkeunana ka unggal désa.

***

Tangtu saréréa ogé sapamadegan, maca téh penting. Naon anu jadi panyileukan hiji jalma, bisa disubadanan ku cara maca. Mang Dahing bisa jadi patani nu mamur, sabada maca buku ngeunaan cara tatanen nu hadé. Kitu deui Bill Gates, anu katelah avid reader, bisana ngulik software komputer téh sabada macaan literatur komputer. Sasatna ku ayana bacaan, anu ngalantarankeun Bill Gates jadi jalma pangjegudna sadunya téh. Malah apan dina novél beunang Cérvantes mah, Don Quixote, bahan bacaan ogé bisa mangaruhan pipikiran hiji jalma.

Anu raresep maca, tangtu nyaah pisan kana buku téh. Tan Malaka, upamana, maca jeung ngumpulkeun buku téh éstuning jadi pacabakan sapopoé. Najan sababaraha kali manéhna kudu pipisahan jeung pabukon, lantaran keur jadi buronan. Malah, kungsi apan, lantaran sieun kapanggih buku téh nepi ka disumputkeun di jero cai, ditéang deui ti hilirna (Madilog, 10-17). Atuh Ajip Rosidi, sabada ngumbara di Jepang téh, balikna ridu ku buku, nu jumlahna nepi ka puluhan rébu judul.

Hanjakalna, pamadegan pentingna maca téh, di urang mah henteu dirojong ku réalitas nu nembrak. Mun saban jalma boga pikiran yén maca téh perlu, meureun buku ogé milu payu.

Naha enya masarakat Indonésia teu raresep maca? Pananya kawas kitu téh, kadéngéna geus bari pisan, turta remen teuing digulanggapér. Titénan baé tulisan-tulisan nu aya patalina jeung maca, réréana mah apan nyaritakeun nyirorotna karep maca masarakat Indonésia. Nu jadi sababna, saréréa gé geus papada apal : bahan bacaan téh can jadi pangabutuh masarakat, loba nu teu kabedag meuli buku, atawa di urang mah leuwih populér kénéh télévisi ti batan bahan bacaan. Ti dinya, bray wéh loba nu méré palakiah alias solusi, pangpangna ti para ahli atikan. Cénah karep maca téh kudu dipelak ti keur budak, digemuk ti lelembut.

Geus ti sababaraha taun katompérnakeun, pasualan pentingna maca téh ukur jadi gunem-catur. Ari nu nembrakkeun pamanggih mah, apan geus loba. Kudu kitu, kudu kieu. Ngadegkeun pabukon téa, subsidi kana buku sangkan hargana leuwih murah, atawa ngadégkeun organisasi pikeun pamaca kawas Gerakan Nasional Pemasyarakatan Minat Baca (GPMB). Ngan arang nu metu, da geuning toko buku mah loba nu ngaheruk alatan suwung ku nu balanja.

Geura, urang nyobaan ngabanding-banding jeung nagara deungeun. Di Malaysia, taun 2000, jumlah buku anu dicitak téh 15.000 judul, ari di Indonésia mah ngan 2.000 judul. Padahal jumlah pangeusi éta dua nagara téh ganjorna leuwih ti 150 juta (Kompas, 17/12/2000) . Kitu deui dumasar kana survéy hiji koran di Jepang, urang Jepang mah rata-rata maca 1,5 buku dina sabulanna. Angka sakitu téh nyirorot upama dibandingkeun jeung saméméhna. (Mizan Online).

***

Ngarobah budaya lisan kana budaya tulisan téh apan merlukeun lalakon nu panjang. Bisa jadi, geus jadi impian urang saréréa, hiji waktu buku téh bari jadi batur hirup masarakat, toko buku henteu leungiteun nu balanja, sarta pabukon teu weléh haneuteun. Dina ngudag éta impian, henteu cukup ku kahaat pamaréntah méré subsidi buku, atawa awong-awongan ka unggal jalma yén maca téh penting. Urang ogé perlu nilik kaayaan masarakat anu resep kénéh diwowoy, tacan boga kabiasaan néangan bahan bacaan. Éstuning sakasampeurna baé; naon nu aya di imah, nya meureun dibaca. Pangna kitu téh, lantaran can tumuwuh kacinta maranéhna kana pangabutuh maca, ari numuwuhkeun kacintaan maca apan kudu ngarobah kabiasaan, anu lalakonna kaitung panjang téa.

Nya pagawaéan Mang Uju pisan anu cék kuring kasebut réalistis mah. Manéhna henteu kungsi nepikeun palakiahna sangkan masarakat raresep maca. Der baé nyadiakeun bahan bacaan, najan modalna ukur sepédah jeung pangadaék. Mang Uju boga pamadegan, di lembur mah nyebarkeun bahan bacaan kudu door to door, lantaran maranéhna henteu boga kasempetan pikeun nganjang ka pabukon atawa toko buku. Henteu nyadiakeun duit keur meuli buku deuih, bisa jadi alatan weritna ékonomi.

Cénah, sawatara urang anu sok nyéwa buku, jadi terus "kagégéloan" ku bahan bacaan. Éta ogé, pangna kitu téh, sabada manéhna boga kabiasaan maca dina waktu nu katibang lila. Aya ogé nu terus resep ngarang, malah kungsi dimuat dina Majalah Manglé.

Mun kabiasaan kawas kitu tumuwuh di unggal wewengkon, urang baris meunang gambaran kumaha nasib buku-buku ka hareupna. Upama sabagéan masarakat boga anggapan yén maca téh ukur jadi pagawéan kaom intelektual, boa engké mah jadi pagawéan masarakat umumna, teu béda kabiasaan lalajo télévisi ayeuna. Cag.***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...