Bagikeun ka Lapak Facebook

Sastra SundaDongéngKemis, 12 Juli 2012 19:35

Dongéng Si Uya jeung Si Onyét: Sasab ka Kota

Ku Dadan Sutisna

Hidep inget kénéh dongéng Sakadang Monyét jeung Sakadang Kuya? Rupa-rupa apan dongéngna téh: Sakadang Monyét Melak Cau, Sakadang Monyét Maling Cabé, Sakadang Monyét Ngala Nangka, jeung réa-réa deui. Tah, ayeuna, éta dongéng téh urang teruskeun deui. Ngaranna gé urang landi baé nya, entong maké saka­dang. Si Uya jeung Si Onyét, ambéh pondok. Ngan ayeuna mah éta dua sobat téh caricingna lain di leuweung, tapi di kota. Pang­na ma­ranéhna sas­ab ka kota, lalakon­na téh kieu:

Ti ba­heu­la ogé Si Onyét mah be­de­gong, gu­minter, de­leka deu­ih. Ari Si Uya, najan leumpangna boyot, tapi réa akal. Si Uya mindeng dikakaya ku Si Onyét, ngan anéhna téh maranéhna bet sosobatan baé.

Hiji mangsa Si Uya keur moyan luhur batu, di sisi walungan. Torojol Si Onyét. Gék diuk gigireun sobatna bari ngagaroan sirah.

"Uya...!" pokna, bari nepak batok Si Uya.

"Heehh." cék Si Uya, teu ngalieuk-lieuk acan, da keur nundutan.

"Ari urang hirup téh rék kieu baé?"

"Heehh."

"Enya, ti baheula cicing leuweung. Bosen uing mah. Unggal poé ukur nénjo tatangkalan. Atuh babaturan urang mimiti areuweuh. Pa Maung jeung Mang Mencek dicerek ku paninggaran."

"Heehh."

"Urang téh tinggal duaan, Uya. Bayeungyang deuih, da tatangkalan di leuweung ditaluaran ku manusa. Mending urang ngalalana, yu!"

"Heehh."

"Sugan baé di tempat anyar mah leuwih betah. Mun Uya capé, keun baé ku uing digandong. Hayu atuh, Uya?"

Si Uya beunta. Rét ka Si Onyét.

"Aéh, geuning manéh, Onyét. Geus lila?"

"Uing ngomong ti tatadi téh teu didéngékeun kitu?"

"Har? Naha nyarita naon?"

Si Onyét mani kekerot awahing ambek. Bis baé sukuna néjéh batok Si Uya. Si Onyét malikan deui omonganana, nyaritakeun pamaksudanana. Si Uya unggut-unggutan.

"Cék uing mah mending di dieu. Di nagara manusa mah can tangtu aya leuwi."

"Naha Uya henteu bosen cicing baé di leuweung?"

"Ari Onyét, apan urang mah geus ditakdirkeun cicing di leuweung."

"Mending milu, nya. Urang ka kota!"

"Kumaha mun ditéwak ku jelema?"

"Nya urang kabur wé."

"Manéh bisa kabur. Da uing mah leumpangna boyot."

"Apan digandong. Uing rék satia ka manéh, Uya. Moal, moal ditinggalkeun. Mun paéh, urang paéh babarengan."

"Alah, teu percaya uing mah. Geuning basa maling cabé patani gé, uing mah ditinggalkeun. Ampir-ampiran dipeuncit harita téh."

Si Onyét nyéréngéh, sigana inget deui kana lalakon baheula.

"Moal ayeuna mah, Uya. Suwér!"

"Cak siah!"

"Jadi rék milu, nya?"

"Moal."

"Sing karunya ka uing, Uya. Piraku uing ngalalana sorangan."

"Heug atuh, tapi aya saratna?"

"Kumaha tah?"

"Manéh kudu nurut ka uing, ulah mawa karep sorangan."

"Enya, enya. Rék nurut!" Si Onyét terus ajrag-ajragan awahing ku atoh.

*

ISUKNA, éta dua sobat téh arindit ti leuweung. Si Onyét mani angkaribung mekel dahareun. Ari Si Uya mah léngoh wé, da ripuh cenah ari kudu babawaan ongkoh mah. Nepi ka sababaraha poé laleumpangna téh, da puguh mindeng eureun.

"Naha teu nepi baé, nya?" cék Si Onyét, basa keur reureuh handapeun tangkal. Kituna téh bari nyusutan késang.

"Bongan saha, naha atuh boga kahayang nu lain-lain. Tapi da geus kagok ayeuna mah."

"Enya, geus kagok."

Terus laleumpang deui.

Poé katujuh, basa wanci geus nyedek ka peuting, maranéhna nepi ka jalan raya. Puguh baé duanana bengong, nénjo mobil pasuliwer, lampu patingsalebrot matak sérab.

"Ieu téh sawarga téa, kitu?" Si Onyét mani olohok.

"Teuing atuh!" Si Uya gé sarua hélokna.

"Resep, Uya. Uing mah kakara nénjo nu kieu. Ari éta nu caraang téh sato naon, nya? Moal enya cika-cika gedé-gedé teuing?"

Duanana terus leumpang mapay sisi jalan, bari teu weléh luak-lieuk. Keur kitu, reg aya beus kota eureun. Jrut aya nu turun, nyampeurkeun Si Onyét jeung Si Uya.

"Badé ka dayeuh? Hayu naék, beus panungtung yeuh!"

Si Onyét jeung Si Uya ukur olohok. Basa ditelek-telek, geuning nu nanya téh Mang Mencek. Tadi mah teu pati écés.

"Mang Mencek éta téh?" cék Si Onyét.

"Enya, geuning nyaho ka kuring?"

"Uing Onyét, Mang. Ieu Si Uya!"

"Beu, geuning dulur ti leuweung. Naha bet araya di dieu?"

"Puguh kieu lalakonna téh..."

Teu kebat, sabab kelakson mobil kaburu disada tarik pisan. Si Onyét jeung Si Uya patingrarénjag.

"Milu heula wé, engké ngadongéngna mah." cék Mang Mencek bari mangku Si Uya. Kalacat kana beus, Si Onyét nuturkeun. Gék dariuk dina korsi kosong. Si Onyét rarat-rérét. Geuning di jero beus téh méh pinuh ku bangsa sasatoan, siga babaturanana di leuweung. Ngan teu warawuh, da batur mah garinding, maraké baju.

"Tuh, anu nyupiran téh Pa Maung." cék Mang Mencek bari tutunjuk. ***(Dadan Sutisna)

Kumaha cenah terasanana? Antosan wé nya...

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...