Bagikeun ka Lapak Facebook

Sastra SundaCarita PondokKemis, 12 Juli 2012 19:24

Potrét Hideung (1)

Ku Dadan Sutisna

Carita Mistéri ku Dadan Sutisna)*

JAM sawelas peuting. Di luar hujan ngaririncik.

Maman jeung Marni guntreng kénéh di kamar. Sakapeung hoghag, sakapeung patingcikikik.

"Sabaraha dinten deui cuti téh, Kang?" Marni ngadeukeutan Maman nu keur anteng ngoprék télévisi. Nu ditanya kalah ka muka laci méja, ngaluarkeun VCD sababaraha hiji. Sup diabuskeun kana DVD-Player.

"Étah, ari ditaros téh sok kalah ka baeud. Moal enya anyar kénéh nikah tos silih baeudan?"

Maman ngalieuk bari imut. "Saha nu baeud?"

"Geuning ditaros teu ngawaler?"

"Ari kitu naros naon bieu téh?"

"Duka, ah!" Marni ngajanggilek.

"Tuh, pan, Marni anu baeud mah. Tilu dinten deui asana. Mung dipasihan cuti 10 dinten atuda. Sakitu gé tos leuheung, Mar. Batur mah aya nu ukur dipasihan tilu dinten."

"Jadi panganténan téh tos saminggu?"

"Muhun."

"Asa cikénéh, nya?"

"Naon nu cikénéh téh?"

"Muhun, nikah. Asa kamari Akang ngalamar téh..."

Maman nyokot rémot. Tapi gancang dipiheulaan ku Marni.

"Badé nyetél naon?"

"Nyetél pilem. Akang gaduh pilem anyar."

"Pasti pilem horor..."

"Pilem naon deui atuh, da éta karesep Akang mah."

"Cik atuh, Kang, ieu téh tos ampir tengah wengi. Malem Juma'ah deuih. Piraku nyetél nu serem-serem. Nu rada romantis gé aya, pan?" Marni naleukeum kana tonggong Maman. Rémot dicekelan kénéh.

"Panasaran..."

"Pilem naon, sih?"

"Wedding Day's Terror!"

"Teu kénging, ah! Kumaha mun katuliskeun? Pan urang téh anyaran nikah..."

"Moal nanaon. Cik ka dieukeun rémotna, geulis!"

"Teu kénging!"

"Eum, sok hoyong dipaksa waé ieu mah!"

"Kadé bisi nyetrum, Kang. Tadi cék Bi Darsih aya pagawé PLN ka dieu, ngalereskeun listrik, dugi ka naék ka para sagala rupa..."

"Da asa teu ku nanaon listrik mah..."

"Duka atuh, da cék Bi Darsih..."

Keur guntreng kitu, panto kamar aya nu ngetrokan. Jep duanana jempé.

"Néng, Néng Marni!" sora Bi Darsih.

"Aya naon, Bi?" Marni ngadeukeutan panto. Bray dibukakeun. Bi Darsih geus ngajanteng lebah lawang.

"Aya nu nyanggakeun ieu..." Bi Darsih ngasongkeun bungkusan dina palastik hideung.

"Naon éta téh?" Marni kerung.

"Saurna mah potrét-potrét waktos Enéng nikah..."

"Euh... cik atuh!" Marni nyokot bungkusan. Bi Darsih mah terus ngaléos deui.

Marni nutupkeun panto kamar.

"Kang, potrét tos janten!" Marni satengah luncat kana kasur. Gancang muka bungkusan, panasaran tayohna téh.

"Telat pisan tukang potrét téh. Saminggu mani kakara jol..." cék Maman bari mencétan rémot. Bray gambar dina télévisi. Sora musik nu mawa keueung mimiti kadéngé.

"Kang... teu kénging nyetél pilem horor atuh!" Marni ngarenghik. "Mending ningalan potrét geura..."

Éléh déét, télévisi ku Maman dipareuman deui. Terus cengkat ngadeukeutan pamajikanana. Marni anteng mukaan albeum. Panonna sakapeung gigisik.

"Kang! Aya nu anéh!" pokna semu reuwas.

"Nu anéh naon? Beungeut Akang jadi beuki kasép, nya?"

"Ka dieu heula sakedap!"

"Apan ieu gé tos gigireun Marni!"

"Enya, ngan éta soca tong rarat-rérét ka mana waé. Ieu tingali!"

Maman ngised. Diukna ngaréndéng. Panonna anteng ngimeutan potrét-potrét nu ditunjukan ku Marni.

"Asa euweuh nu anéh. Beungeut Akang angger kieu. Beungeut Marni gé angger. Pédah éta meureun, rada pangling sotéh dangdananana béda ti sasari. Ngaranna gé pangantén atuh, piraku mun dapon diwedak téh. Apan Marni mah didangdanan ku salon, lin?"

"Ih, na ari Akang! Nganggo kaca soca geura, ngarah sidik!" Marni rada baeud.

"Sok atuh wartoskeun, naon nu anéh téh?"

"Tingali heula nu ieu..." Marni nunjuk potrét dina lambaran mimiti. "Potrét urang nuju dirapalan. Ieu Akang, ieu Marni, calik ngaréndéng. Payuneun urang, padamel ti KUA, mengkeran kaméra. Bapa sareng saksi-saksi calikna di gigir..."

"Enya, enya, terus naon nu anéhna?"

"Tingali pengkereun urang. Aya nu ngajanteng, nganggo tiung hideung, malik ka tukang!"

"Hahaha!" Maman ngagakgak. Marni olohok.

"Naha bet gumujeng?"

"Teu matak anéh nu kitu mah. Ngaran-ngaran keur dirapalan, pasti seueur jalmi. Nya kabeneran wé meureun éta mah aya nu ngajanteng di dinya!"

"Bisa jadi, da urang henteu sidik kana beungeutna. Henteu terang saha-sahana. Tapi titénan nu séjénna..." Marni mukaan deui potrét. "Méh di unggal potrét, aya nu ngajanteng ditiung hideung..."

Maman mimiti kerung. "Enya, nya..."

"Nu matak teu kaharti mah nu ieu..." cék Marni. "Akang gé tangtos émut kénéh, waktos urang dipotrét di kamar pangantén, teu aya sasaha deui. Urang dipotrét bari calik dina kasur. Akang nuju ngaléng abdi. Tapi éta di pengker, nu ditiung bet aya deui. Nuju calik nukangan kaméra. Siga nu adek kana tonggong Akang!"

"Masya Alloh, naha bet bisa kitu?"

"Anéh puguh ogé..."

Duanana patingharuleng. Di luar kadéngé kénéh sora hujan.

"Boa-boa lain jelema, Kang!" Marni tipepereket nyekelan taktak Maman. Awakna ngadadak patingsariak.

"Sakedap, ulah ngémut nu teu pararuguh..." Maman ngalelemu. "Dina unggal potrét, aya nu ngajanteng ditiung hideung, nukangan, beungeutna henteu sidik. Mun téa mah harita aya nu datang maké tiung hideung, keur nanahaon mani mimilu unggal urang dipotrét. Da geuning dina potrét séjén mah, nu euweuh Marni jeung Akang, henteu katémbong. Hartina manéhna ukur hayang dipotrét jeung urang..."

"Muhun, tapi saha?"

"Katingalna mah awéwé..."

"Awéwé?" Marni kerung.

"Pamohalan aya lalaki indit ka nu kawinan mamaké tiung. Hideung deuih, siga rék jajap nu ma..." Maman teu kebat nyaritana, biwirna kaburu dibekem ku Marni.

"Atos, sok keueung Marni mah..."

"Énjing urang taroskeun ka nu nampi tamu. Sugan manéhna terangan ka éta awéwé."

"Enya, Kang. Urang mah apan bororaah nengetan sakur nu datang. Sakitu keur kaweurna. Sigana peryogi ditaroskeun deui ka potograperna."

"Tapi boa lain awéwé deuih..." cék Maman satengah ngomong sorangan.

"Awéwé-lalakina mah teu penting. Ngan naon maksudna éta mangkeluk pipilueun dipotrét?" Marni rada baeud.

"Enya, énjing urang talungktik. Ayeuna mah geura kulem, tos ampir tengah wengi geuning."

Marni gancang mérésan albeum, diasupkeun deui kana palastik urutna. Maman mah ngadeukeutan deui télévisi. Keur kitu...

"Kang...!" pokna rada tarik.

Maman ngalieuk. "Aya naon deui?"

"Dina palastik téh geuning aya VCD. Sigana hasil suting basa urang nikah."

"Badé disetél ayeuna?" Maman ngalieuk.

"Kumaha mun énjing?"

"Panasaran. Cik ka dieukeun!"

Ku Marni VCD diasongkeun. Maman rurusuhan ngahurungkeun télévisi. VCD geus diasupkeun. Mimiti katémbong gambar. Kredit titél.

Nu duaan mencrong kana télévisi mani teu ngiceup-ngiceup. Mimiti katémbong nu keur seserahan, nu biantara, ka dituna rekaman walimahan.

Marni nangkeup tipepereket. Najan samar, dina gambar, tukangeun Maman aya nu ngajanteng nukangeun. Maké baju sarwa hideung. Beungeutna teu écés. Sakapeung, nu hideung ngabelegbeg téh ngageuleuyeung ti kénca katuhu.

*

JAM dualas peuting. Télévisi geus dipareuman. Marni nangkeupna beuki tipepereket, sabab teuing ti mana jolna, bet kadéngé sora nu ceurik ngabangingik.*** (Hanca)

)* dimuat dina majalah Manglé, nganggo sandiasama Asép Sundira

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...