Bagikeun ka Lapak Facebook

Arsip MediaKemis, 12 Juli 2012 06:28

Sindén Béntang Tingbarayay di Subang

Ku Dhipa Galuh Purba

 

NAJAN budaya deungeun geus nerekab tur ngakar nepi ka tepis wiring, tapi perkara éta henteu ngalantarankeun pareumna ajén-inajén kasenian Sunda, hususna widang kapasindénan anu tos dirintis ti jaman kapungkur. Sakumaha anu dibéwarakeun dina SB nomer pengker, yén ahir taun 2004 digelar Pasanggiri jeung Féstival Sindén Titim Fatimah, kalawan alpukahna Pemkab Subang, Déwan Kasenian Subang jeung PT. Pikiran Rakyat. Acara lumangsung kalayan suksés tur nyugemakeun. Ditilik tina jumlah pamilonna ogé, leuwih undak dibandingkeun jeung pamilon pasanggiri sindén taun saméméhna (2002). Tina hasil padungdengan déwan juri, ahirna mutuskeun Nunung Nurmalasari, sindén ti tatar Bandung, minangka pinunjul pasanggiri jeung féstival Piala Titim Fatimah. Maruta Bayu, wartawan SB, baris ngadadarkeun laporan lumangsungna acara. Namung, dina SB Désémber, aya kalepatan informasi ngeunaan waktu lumangsungna acara. Sakumaha anu dikedalkeun ku M. Nana Munajat, Sekertaris Umum acara Pasanggiri, mémang kawitna mah acara téh baris lumangsung ti tanggal 5 nepi ka tanggal 12 Désember 2004. Saterasna aya parobihan deui, nyatana 24 dugi ka 30 Désémber. Namung dina émprona, acara téh dipajukeun deui, nya puncakna acara téh tangga 18 Désémber 2004. Ku ayana kitu, ieu warta ogé minangka ralat tina kalepatan dina SB anu kalangkung.

*

SUKSÉS tur nyugemakeun acara Pasanggiri jeung Féstival Piala Titim Fatimah téh. Malah teu nyangka, manahoréng masarakat téh masih neundeun katineung kana dunya kapasindénan. Kitu anu dikedalkeun ku Dr. Sri Hastanto, Deputi Bidang Seni Budaya dan Film Kementerian Kebudayaan dan Pariwisata. Sri Hastanto anu hadir ngaluuhan éta acara, kacida reueusna nyaksian antusias para pamilon tur penongton, anu minuhan Gedong Wisma Karya, Jln. A. Yani, Kabupatén Subang. Mémang dina poé Saptu, 18 Désémber 2004, nu hayang nyaksian final pasanggiri jeung féstival Piala Titim Fatimah téh, méh henteu kawadahan. Rohangan anu legana kurang-leuwih 10 m X 20 m téh pinuh ku para penongton nu écés pisan hayang milu jadi saksi acara pasanggiri jeung féstival sindén tingkat nasional. Puguh baé ieu acara téh diluuhan ku Bupati Kab. Subang, Éép Hidayat, Dr. Surya , Direktur Kesenian Kementerian Kebudayaan dan Pariwisata, sarta H. Hilman B.S Pamingpin Umum Koran Sunda Galura.

Henteu hilap, Dr. Sri Hastanto ogé ngedalkeun rasa kareueus ka PT. Pikiran Rakyat, anu geus ngarojong éta acara tug nepi ka bisa lumangsung kalawan suksés. Padahal, nurutkeun Dr. Sri Hastanto kénéh, dina mangsa kiwari, perusahaan swasta kasebut langka, anu daék ngarojong acara seni budaya. Atuh pikeun ka hareupna, Dr. Sri Hastanto miharep sangkan kagiatan pasanggiri jeung féstival sindén téh bisa ngalahirkeun sindén-sindén anu lain baé ukur manggung di tingkat régional, tapi ogé nasional jeung global. Dina hal ieu, Dr. Sri Hastanto ngarojong sangkan kalumangsungan dunya sindén téh kudu terus dipiara, dilestarikeun, sarta dimekarkeun.

PT. Pikiran Rakyat mémang nyayagikeun hadiah keur para pinunjul anu kaitung badag, ti mimiti piala nepi ka motor. Dina hal ieu, H. Syafik Umar, Diréktur utama PT. Pikiran Rakyat ngécéskeun yén Pikiran Rakyat Group geus sakuduna ngarojong kagiatan anu enas-enasna miara, ngalestarikeun, sarta ngamekarkeun ajén seni budaya, hususna Sunda. Minangka surat kabar anu éksis di Jawa Barat, Pikiran Rakyat geus jadi milik warga Jawa Barat. Kitu saur H. Syafik Umar, kalayan nandeskeun yén PT. Pikiran Rakyat Group sacara konsistén ngamuat aprésiasi ngeunaan seni-budaya daérah sacara konsistén. Saperti dina HU. Pikiran Rakyat, unggal poé Saptu, sacara husus ngamuat suplémén Khazanah, anu eusina ngawengku seni-budaya daérah. Kitu saur H. Syafik Umar, sakumaha anu dimuat dina HU. Pikiran Rakyat (20/12/04).

*

DUMASAR kana catetan panata calagara ngeunaan para pamilon Pasanggiri jeung Féstival Piala Titim Fatimah, dina taun 2004 mémang leuwih undak dibandingkeun jeung taun saméméhna. Upama taun saméméhna pamilon Pasanggiri téh ukur diiluan ku 24 urang, nya dina taun ieu mah bisa nepi ka 39 urang Pon pilalagi dina katégori festival-na ogé sarua leuwih undak batan taun saméméhna. Tahun 2004, pamilonna aya 33 urang, demi taun saméméhna ukur 22 urang.

Sabada ngayakeun padungdengan anu daria, ahirna Déwan Juri mutuskeun yén Nunung Nurmalasari, sindén ti Kota Bandung minangka pinunjul kahiji jeung pinunjul favorit, dina katégori Pasanggiri. Ku ayana kitu, Nunung dilélér hadiah duit anu gedéna Rp 5 juta, motor jeung piala ti PT Pikiran Rakyat Bandung, sarta layang pangajén ti Kementerian Kebudayaan dan Pariwisata. Dina Pasanggiri Sindén kamari, Nunung ngahaleuangkeun kawih anu judulna "Bangbung Hideung", "Kulu-kulu Bem", jeung "Kulu-kulu Gancang". Pinunjul kaduana beunang ku Rasih Cicih Muda (Kabupatén Subang) dina haleuang anu judulna "Sruping Argo", "Kastawa", jeung "Bungur". Rasih Cicih Muda dilélér hadiah duit anu gedéna Rp 4 Juta. Disusul ku pinunjul katilu, nyatana Mamah Hayati (Kabupatén Bandung), anu ngahaleuangkeun "Ekek Paeh", "Panghudang Rasa", jeung "Rancag". Mamah Hayati dilélér hadiah duit anu gedéna Rp 3 juta. Pinunjul kaopat, beunang ku Rika Rafika (Kabupatén Bandung), anu ngahaleuangkeun "Ekek Paeh", "Balaganjur", jeung "Gendu". Rika Rafika dilélér hadiah duit anu gedéna Rp 2 Juta. Pinunjul kalima beunang ku Maé Nurhayati (Kota Bandung) kalayan ngagalindengkeun haleuang "Coyor", "Udan Mas", jeung "Senggot". Maé Nurhayati ogé dilélér hadiah duit anu badagna Rp 1 Juta.

Dina katégori féstival, 10 urang sindén mintonkeun kamahéranana, kalawan ampir imbang, mibanda kaleuwihan dina ketakna ngagalindengkeun kawihna. Kilang kitu, tina 10 sindén téh Déwan Juri kudu milih 5 urang pinunjul. Ahirna Nunung Nurmalasari (Kota Bandung) kapilih deui minangka pinunjul kahiji. Disusul ku opat patandang séjénna, nyaéta Cicih Suarsih (Kabupatén Subang), Rika Rafika (Kabupatén Bandung), Nia Kurniasih (Kabupatén Subang), jeung Lilis Jinawi (Kabupatén Bandung). Dina katégori féstival mah, hadiahna sarua; Nunung Nurmalasari, Cicih Suarsih, Rika Rafika, Nia Kurniasih, jeung Lilis Jinawi, dilélér duit anu pangajina Rp 4 juta, piala ti PT. Pikiran Rakyat Bandung, jeung layang pangajén ti Kementerian Kebudayaan dan Pariwisata.

Nilik kana hadiah anu diajangkeun ka para pinunjul, tangtu baé kaitung badag tur matak hélok. Tapi katingalina, motivasi para patandang téh lain kana hadiahna. Kitu anu dikedalkeun ku Tatang Benyamin Koswara, anu harita ngaluuhan acara, bareng jeung seniman Sunda séjénna, saperti Tien Rostini Asikin, Euis Komariah, Eka Gandara, Arthur S. Nalan, Didin Bajuri, jeung sajabana. Iwal ti ngarasa reueus, Tatang Benyamin ogé ngarasa yakin upama lalakon sindén téh katingalina panjang kénéh. Praktisina nyampak kalayan kualitasna henteu bisa disapirakeun. Pon kitu deui, anu ngalalajoanana ogé henteu kakurangan.***

 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...