Bagikeun ka Lapak Facebook

Ukur BanyolHeuheuy DeuhKemis, 12 Juli 2012 03:06

Etom, Sang Profesor

Ku Dhipa Galuh Purba

Modérnisasi cenah. Dunya beuki maceuh ngadu géngsi. Kacanggihan sains jeung teknologi lir taya tungtungna. Unlimited ceuk légégna mah. Di luhur langit masih kénéh aya langit. Di luhur lalangit aya para. Di luhur Jati handap ogé, aya Jati luhur. Kitu kawasna pikeun ngagambarkeun penemuan anyar Mang Étom. Poé kamari Mang Étom geus ngaresmikeun hiji alat super canggih, beunang  ngaracik manéhna sorangan. Saalam dunya kawasna bakal geunjleung upama nyaksian alat super canggih beunang Mang Étom. Nurutkeun balabar kawat di Cigorowék, Mang Étom téh baris ditulis dina Guinnes Books Of  Recor. Tapi teuing iraha-irahana mah.

Alat super canggih Mang Étom téh dingaranan TBC. Tapi omat, ieu mah lain sabangsaning panyakit bengék, koléra atawa sabangsana. TBC anu dimaksud di dieu mah singketan tina The Big Computer. Pangna dingaranan kitu téh, pikeun nyaluyukeun jeung ukurannana anu kaitung mahiwal. Perangkat-na loba pisan. Sawaréh mah nepi ka dipihapékeun di imah Lurah Ukar. Monitor-na  leuwih gedé batan layar tancep. CPU-na oge sagedé lomari. Mouse-na teu kireum-kireumna téh nepi ka sagedé kulkas, da maké gilinding mobil keur majukeunna ogé. Tapi ari keabord-na mah ukur sagedé cangkang korék api.

“Ngahaja éta téh. Sabab lamun teu kitu, pasti moal balancing!” kitu ceuk Mang Étom, basa acara launcing geus dimimitian.

"Ieu komputer téh mangrupa hiji-hijina komputer anu anti virus," pokna deui.

"Naon jaminanna, Prot, aéh Prof?" salah sahiji wartawan tumanya.

"TBC geus ditaliti ku  dokter ahli ti laboratorium forénsik pusat. Nurutkeun kasimpulanna, TBC moal katerap ku sabangsaning Human Immunodeficiency Virus  atawa  virus-virus séjéna,"  kituna téh bari nyelang heula ngenyot udud daun kawung.

“Pa Profésor, moal enya virus HIV asup kana komputer?"

"Kanu Komputer ieu mah apan ceuk kuring ogé moal asup, dijamin tah! Lamun kana komputer séjén, kuring teu wani ngajamin. Sabab dina program ACD See, kuring mindeng manggihan poto jenis BMP atawa JPG anu ngaéksploitasi gambar porno. Tah, program Adobe Fhotoshop téh sok dipaké ngulik gambar anu ditaranjang!" Mang Étom kalah ngacapruk  kamana karep.

“Kumaha lamun ku batu virus nu Abah?” Bah Dinta nyelengkeung ti lawang jandéla.

“Can dipikiran, bah,” témbalna.

"Naon deui kaunggulan TBC anu lainna? kalayan dina komputer séjén tacan kungsi aya, Prof?"

"Loba pisan. Kuring geus masang tujuh rébu opat ratus tujuh puluh tujuh satengah  program anyar. Jaba teu kudu maén instal sagala rupa. Diantarana, program dina TBC téh bisa nganyahokeun umur ingon-ingon, bisa nganjang ka poé kamari, bisa ngeprak anu démontrasi kawas PT Heuras Genggerong, bisa nuduhkeun barang anu leungit, jeung sajabana. Wah pokona mah sagalarupa ogé bisaeun!" ceuk mang Étom mani engap-engapan, méh baé katurelengan saking ku loba teuing norowéco.

"Sok atuh buktikeun!" aya anu ngajorowok rada tarik.

"Siapa takut..." Mang Étom ngajawab bari cengkat tina diukna. Gap kana power TBC. Tuluy dipencét.

"Teu di-passwords ieu mah," ceuk Mang Étom bari ngadagoan TBC-na hurung. Hanjakal pisan, geus aya kana saparapat jam leuwih, TBC  teu daekeun hurung baé. Atuh puguh rada ngadégdég oge Mang Étom téh, pangpangna mah sieun kacanir bangban. Mangkaning hareupeun wartawan.

"Geuning teu waras, Prof?!" tanya wartawan anu diuk panghareupna.

"Sabar," kitu tembalna bari mariksa monitor jeung CPU. Barang bray dibuka tutupna, Mang Étom kacida reuwaseun. Bréh katingali, di jero monitor téh loba barudak leutik anu keur arulin. Aya anu keur ucing sumput, jeung anu gegelutan cara smack down. Mang Étom ngan tibang gogodeg bari muka casing CPU. Barang bray dibuka,  horéng taya binana jeung di jero monitor, loba barudak leutik. Aya anu keur numpak CD Room.  Pajarkeun téh ngareunah bisa muih cenah. Anu dadapangan dina hard disk baé aya. Temahna mah matak jangar ningalina.

"Barudaaaak! Awas aya bom dina komputer!" Mang Étom nyorowok. Buriak barudak kalaluar bari semu sieun. Teu kungsi samenit, barudak geus raat. Bareng jeung éta, ana bray téh  layar monitor bisa hurung. Mang Étom teu sirikna surak bakat ku atoh.

"Tuh, pan waras nyah!" bari nunjuk kana tampilan layar monitor.

"Enya bener. Tapi kumaha cara ngagunakeunnana Prof? sayah jadi panasaran,"

"Gampil. Tinggal sebutkeun ngaran, tuluy ngomong, luyu jeung anu rék ditanyakeun ku didinya,"

"Nyobaan, ah. Kabeneran tadi di jalan leungit kacamata. Ngaran sayah Joni. Di mana kacamata sayah ayeuna?" pokna bari mendeko kana komputer.

"Apan étah dipaké!" témbal TBC. Sorana kadéngé tina spéker. Atuh saréréa ogé mani marolohok. Jeung dina enyana deuih, kacamatana téh tatadi oge sidik dipapaké.

"Nami abdi Anto. Basa lebaran kadua, abdi ical mobil kijang warna hejo métalik.  Plat nomberna D 1207 BU. Di mana ayeuna nyah?" aya wartawan anu nanya deui ka TBC.

"Tinggal tanyakeun baé, ka nu maké mobil pangpandeurina!" témbalna.

“Abdi Cép Among. Saha jodo abdi?”

“Téangan béntangna Cigorowék, budak Lurah Ukar. Tah éta pijodoeun mah!”

"Abdi Ubéd téa. Minggon kamari kaicalan domba bikang tilu,"

"Apan dipeuncit ku sia!"

"Uing Jekong. Iraha uing rék kawin?"

"Ah siah, payu oge henteu,"

"Abdi Johan. Kumaha carana hayang naek gajih?

"Masang susuk sing loba. Tuluy pendekatan ka atasan kudu diutamakeun. Kajeun kudu ngalétakan bujurna ogé, wayahna ulah teu daék. Nu sahandapeun tincakan. Anu sapantar mah tinggal sikuan baé, gampang!"

"Ngaran uing Sarwan. Sabaraha nomber anu bakal kaluar isukan?"

"Na sia téh make jeung hayang meuli nu kitu patut. Nyaho eta téh haram, goblog! Jeung deui apanan nomber téh geus dicaram berédar. SDSB ogé ditutup. Bangkawarah pisan jalma anu ngayakeunna téh. Ari sia rék milu bangkawarah deuih?! Dibabad ku aing geura!!!" TBC téh ngadadak sesentak lir anu ambekeun naker. Nepi ka anu nanyana ogé méh katurelengan.

"Abdi ical bumi..."

"Na sia téh kawas anu gélo baé. Piraku aya imah leungit?!" TBC nyentak deui, malah bari kukulutus sagala  rupa. Tungtungna mah unggal anu nanya, sok tuluy dicarékan laklak dasar. Kaasup anu teu tuah teu dosa ogé milu kacarekan.

"Hampura euy, aya gangguan téhnis sigana mah! Poho bieu, teu ngaaktipkeun program anti-marah." Mang Étom nyarita rada tarik.

"Gangguan téhnis nanahaon sia téh, Étom. Ngaréken gélo ka aing?" TBC némbalan. Atuh puguh Mang Étom oge ngaranjug. Malah bakat ku soakna nepi ka ngompolan manéh. Calanana mani jemblang. Komo basa nyaksian mitohana kaluar ti jero Monitor bari mamawa mik mah, mang Étom leuwih ngeleper.***

Kailhaman sabada ngawangkong jeung Rudi H Tarmidzi, Galuh Taruna, 2001

 Dimuat di Majalah Mangle

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu:
  
  • Senén, 03 Fébruari 2014 19:50

    fathan

    ya allah meni seer pisan kajahatan...
  • Senén, 27 Januari 2014 16:44

    agus sofyan

    Simkuring mani hoyong maca carios sunda ti ngawitan Gumilar , Wijana, sibuntung jago tutugan tug dugi ka Jaka santang..mani...
  • Jumaah, 24 Januari 2014 19:20

    yudha

    Tumaros, dimana tiasa mendakan buku Si Buntung Jago Tutugan? hatur nuhun pisan....
  • Jumaah, 24 Januari 2014 11:05

    Nandan Kusmanagiri

    Wilujeng makalangan, langkung pogot sigana upami tos aya aplikasi dina android...
  • Jumaah, 03 Januari 2014 19:18

    Erwin Kusumah

    Kang dupi wawaran perkawis FDBS teu ditayangkeun di...
  • Jumaah, 03 Januari 2014 11:06

    Ai Karlinawati

    Hoyong milarian conto wawacan kanggo murangkalih hanjakal teu aya..hatur nuhun ..Mugia website ieu lana...
  • Saptu, 21 Désémber 2013 14:14

    iklanzoom.com

    Asalamualaiakum dari iklanzoom.com semoga pendidikan Indonesia tambah maju wasalamuaalaikum fresh...
  • Saptu, 02 Novémber 2013 18:31

    Sukinah Boiman

    Alhamdulillah upami di kota Bandung gaduh sakola favorit ngiring bingah, kumargi lami-lami upami basa sunda pada ninggalkeun bisa punah...

Badé ngomén? Mangga klik di ieu.

SN

Jumaah, 05 Désémber 2014 02:44

Parobahan Raperda No 15, Baris Mancegkeun PDAM Tirtawening

(SundaNews, Bandung) Sabada Raperda Parobahan Perda No 15/2009 disahkeun Pansus II DPRD Kota Bandung ahir Agustus 2014, ...
SN

Kemis, 04 Séptémber 2014 09:19

Pansus V DPRD Nargétkeun Bandung Meunang WTP Taun 2015

Sundanew.com, Ketua...
SN

Jumaah, 18 Juli 2014 02:37

Chace jeung Media Nu Sologoto

(SundaNews) Salah sahiji nu penting di Google téh nyaeta fungsi cache. Hiji kontén dina wéb, sanajan geus...
SN

Rebo, 28 Méi 2014 01:32

Prabowo Cangcaya Surya Dharma Ali Kalibet Korupsi

(SundaNews, Jakarta) Naon anu diucapkeun ku Capres Prabowo Subianto ngeunaan ditéwakna Suryadharma Alie ku KPK dina...
SN

Rebo, 28 Méi 2014 01:09

Din: “Amien Rais Kuduna Némbongkeun Sikep Negarawan”

(SundaNews) Ketua Umum Pimpinan Pusat Muhammadiyah Muhammad Din Syamsuddin manghanjakalkeun kana sikep Amien Rais anu...